Mark 14
Judea Babadahi Yesu Vihiraghenana hi Ogatarei
(Matthew 26:1-5; Luke 22:1-2; John 11:45-53)
1Ma marina yana maratom ruwagha aumurina da Verauvira* ma Payawa Egha Hahanana a Toreha.* Gudutaupuyoweina* ghaeghaehi ma raugagayo tauvihanahanapuweina, yana tayaha hi baibaiha po Yesu govagovaghanei hita pani ma hita vihiragheni 2ma hipa, “Egha toreha auhinenina ta dewadewai apo rava ata ghaviya hina vomahiri.”Wavine, Yesu Oyohiyei i Vi'oyohi
(Matthew 26:6-13; John 12:1-8)
3Yesu yana au Bethany Simon a au numa, we ravana aunaona opina i paga ma i yawahana. Maranai Yesu i am'am ana au numa, ma wavine i ne'i po oyohi jimujimumuna maihana ghaeghaena ana wava nard. We oyohina botorana auhinenina alabastei ▼ hi dewai, ma uwana'ava i gahi po Yesu au unu'ununa i hiwaghi. 4Ma rava ghehauhi nahidana amohi i ghaighai po hi taraviravira hipa, “Aiwa aubaina po we oyohina i raukahiyarei? 5Apo emo'emosina hita gimarei po mane ghaeghaena ▼ hita vaini po rava waiyamoyamonahi hita verehi!” Anima hi enibo'ai.6Ma Yesu ipa, “Ona votere aharei! Aiwa aubaina po o raiwenoi? Dewa ahi'ahina auwari'u i dewai. 7Rava waiyamoyamonahi hauga davodavona apo maitehi ona ma'ae ma mara ghehauna ona ghohei, yana ona vohaguhi. Ma ta'u yana apo mara haburuna'ava ma apo a ne'aharemi. 8Aiwa emo'emosina po ita dewadewai yana i dewai, oyohi au opi'u i terei yana mara muriyai ghuruva'u aubaina i vononoghe'u. 9Marina auwarimi aiwa ai babaniyei yana moina, dobu atapuna mepa tuyegha ahi'ahina hi rauguguyei yana, we wavinena aiwa i dewadewaiya apo a rainuwaghana hina babaniyei.”
10Anima a tauvotagho 12, auhinenihi emosi wavana Judas Iscariot, i nae gudutaupuyoweina* ghaeghaehi auwarihi po Yesu ita vibenabenamei. 11Ma tauhi aiwa i ririweiya hi nonori yana hi kaoha, ma hi vi'anina da mane hina verei. Ma Judas i vikare po gavogavo i baibaiha po Yesu ita amverenei auwarihi.
Yesu, a Tauvotagho* Maitehi hi Am Gogona Verauvira au Torehana
(Matthew 26:17-30; Luke 22:7-23; John 13:21-30;
1 Corinthians 11:23-25)
12Mara i ghe'eta po Payawa Egha Hahanana Torehana.* Ma maratom wainaona auwarina yana ahi mumuga po sipu yaubona hina vihiragheni Verauvira Torehana aubaina. Yesu a tauvotagho hi raubayadei hipa, “Mepa u ghohe'ai po ana nae Verauvira amna aubaita a vovaimaihi'eni?”13Anima Yesu a tauvotagho ruwagha i himirihi ma i parihanahanapuhi ipa, “Ona nae au Jerusalem ma oroto waira e'ava'avarai apo ina veraubeemi. Ma ona votaghoi. 14Ma numana e ruiyana taniwagana ona riwei onapa, ‘Tauvihanahanapu ipa, “Metauna hayana auwarina a'u tauvotagho maitehi apo Verauvira yamna ana ani?” ’ 15Anima apo haya ghaeghaena au banobanowa ina vi'atataiyemi, aiwa atapuna yana anina. Ma nahidana aiwa atapuna ona nonoghei aubaita.” 16Tauvotaghohi hi vomahiri po hi nae au Jerusalem, ma aiwa atapuna Yesu i ririweiya nana'arena hi nehaghai, anima Verauvira amna hi vononoghei.
17Maranai au i biga, yana Yesu a tauvotagho 12 maitehi hi ne'i. 18Maranai hi am'am yana Yesu i riwehi ipa, “A riwemi yana taumi emosi apo ina vibenabename'u, tauna aiya maitemi a am'am.” ▼
19A tauvotagho hi nuwa apo'apoe ma hi vikare po emosi po emosi hi raubayada hipa, “Moina da ta'u mai wavu'u? Ma a notanotai da egha ta'u.”
20Ma i paribeehi ipa, “12 aupoumi tauna aiya a'i ruwagha a'i payawa au gaeba a raikabu gogoneiya. 21Ta'u Rava Natuna apo a hiraghe, me Maimaituwa riwana aubai'u hi girugirumiya ina rautaghoi. Aee! Ma vinuwaboyana ira'ata ghagha na ravana aiya, Ta'u Rava Natuna tauvibenabename'u apo ina vi'aroni! Itapa egha hita ghuni yana tauna aubaina apo ita ahi.”
22Maranai hi am'am, ma Yesu payawa i vaini, po pariyei i vi'amamara ma i vokabakabari, po i raughutei a tauvotagho auwarihi ma i riwa ipa, “Ona vaini po ona ani, we'i yana ta'u viyowa'u.”
23Anima keyaka i vaini po i vi'amamara ma i verehi, po atapuhi hi umei. 24Ma Yesu i riwa ipa, “We'i yana ta'u tara'u e wanawana hiwaghi yana rava maghamaghauhi ahi dewabo'a nuwa'aharenana aubaihi, tara'uweina Maimaituwa a vipiko ei raikajijirai. 25Moina a ririwemi, apo egha meyanai wine* a umameei da na au maratomna Maimaituwa a vitaniwaga vouna* auwarina wine vouna a umai.”
26Anima weya hi ravi ma aumurina hi hopu po hi nae au Oya Olive.
Yesu, Peter ana Bovi i Ai Riwei
(Matthew 26:31-35; Luke 22:31-34; John 13:36-38)
27Yesu i riwa ipa, “Atapumina apo ona votere'u ma ona ruba ahare'u, babana Maimaituwa ponana hi girumi a au buka i riwa da Maimaituwa apo tauvipa'ipa'i ina vihiragheni, ma sipu apo hina neyabayababa. ▼ Po atapumina apo ona rovo.28Ma muriyai apo a vomahirime, yana a ainae au Galilee ma ona ne'i po ta vi'emosi.”
29Ma Peter i paribeei ipa, “Ta'u apo egha meyanai a voterem, havena po atapuhina hina dewai!”
30Ma Yesu, Peter i riwei ipa, “A riwem muriyai po kamkam orotona mara ruwagha ina tou we waguvaraina, yana apo mara tonugha ma riwa da egha uta haramane'u.”
31Apoma Peter paribeeyana kajikajijirana i terei ipa, “Apegha meyana a boviyem, mepapo inapa tam ma ta'u ta hiraghe!” Anima a tauvotagho atapuhi riwana emosina hi yatoni.
Yesu i Raupari au Gethsemane
(Matthew 26:36-46; Luke 22:39-46)
32Yesu, a tauvotagho maitehi hi ne au Gethsemane ma i riwehi ipa, “Wehidana ona ma'ama'ae, maranai ta'u a raaupari.” 33Anima Peter, James ma John i taravainihi. Ma na'i yana nuwaboya ma viuva i gheraghoni, 34aubaina i riwehi ipa, “Nuwaviuva au ate'u i ra'ata duma po aughereghere ina raumutu'u. Wehidana ona ma'ae ma ona iya'iyau.”35Anima mara haburuna i veraunae ma i aharemei au dowa, ma i raupari da inapa emo'emosina yana viuvana ana mara ina honagha aharei. 36Ma Yesu i raupari ma ipa, “Ama'u! Ama'u! Ginauri atapuna auwarim yana emo'emosina. Wate we viuvana keyakana auwari'u ma vaina aharei. Ma am rauhoghara ma dewai ma egha ta'u.”
37Ma Yesu i wanavirai yana a tauvotagho tonugha i nehaghai hi eno'eno. Po Peter i riwei ipa, “Simon, we tam e eno'eno? Egha emo'emosina po matam ita kaya, ma uta voma'ae mara haburuna?” 38Ma i riwehi ipa, “Ona iya'iyau ma ona raupari, po egha raudadana auhinenina ona pe'u. Aruwa ei anina, ma viyowa i tapiya.”
39Wate mara viruwaina i naeme po i raaupari, yana babanihi emosihina i hiyavihi. 40Anima i nememe a tauvotagho auwarihi po i nehaghahi yana hi raunuwavuru; ma egha emo'emosina po matahi ita kaya. Yamna aubaina egha hita haramanei da auwarina aiwa hina riwei.
41Maranai mara vitonuina i nememe'i, yana i riwehi ipa, “We taumi yohora o eno'eno ma oi yagohina? Anina! Mara i ghe'eta. Ona inanai marina yana boiboghi ta'u, Rava Natuna, hina amverene'u taudewabo'a ahi au kajijira. 42Ona vomahiri, ma tana nae! Ona inanai ravana tauvibenabename'u i ghe'eta!”
Yesu hi Pani
(Matthew 26:47-56; Luke 22:47-53; John 18:3-12)
43Yesu yohora i babani maranai a tauvotagho emosi 12 auhinenihi Judas i ghe'eta. Ma boru maitehi a apiyahi naipi mena ruwaruwagha ma dabaruma maitehi. Tauhi yana gudutaupuyoweina* ghaeghaehi, raugagayo tauvihanahanapuweina ma babada hi himirihi po Judas maitena hi nae. 44Tauvibenabenamna boiboghi matakiraha ravahi boruhi i verehi ipa, “Ravana naona a yaghoyaghoniya tauna o ghohei. Ona pani yana ona vomomohi po maiteni ona nae.”45Maranai Judas i ghe'eghe'eta yana yaghiyaghina'ava i ghae Yesu auwarina ma ipa, “Tauvihanahanapu!” ma naona i yaghoni. 46Yamna aubaina ma Yesu hi vomomohi po hi panipani. 47Ma nahidana turahi ghehauna i mahimahiri naipi mena ruwaruwagha i sinahori yana Gudutaupuyoweina Gheghetehaharana a taupaura tanighana i tarautuini. 48Ma Yesu i riwehi ipa, “Mara maghamaghauna ta'u maitemi Maimaituwa a au Numa ai hanahanapu! Ma aiwa aubaina egha ota pani'u? Ma egha itapa naipi mena ruwaruwagha ma dabaruma maitehi, ona ne'i po ona pani'u me ta'u raugagayo tauraugahina! Ma we o dewai yana Maimaituwa ana riwa au buka hi girugirumiya ina raimoinai.” ▼ 50Anima a tauvotagho atapuhi hi voterei ma hi ruba aharei.
51Hewari anirauhawawara i oteni, ma Yesu i muritaghoi ipa hina pani, 52ma ana anirauhawawara'ava hi sinagagi po aumurina, ma akanakopana i ruba po i ne'aharehi.
Yesu mai Judea ahi Babada Aunaohi i Mahiri
(Matthew 26:57-68; Luke 22:54-55, 63-71; John 18:13-14, 19-24)
53Yesu hi taravaina naiyei Gudutaupuyoweina* Gheghetehaharana ana au numa, mepa gudutaupuyoweina ghaeghaehi, babada ma raugagayo tauvihanahanapuweina hi emosiyana. 54Peter i vimuritagho po heiyei ma i ruighae Gudutaupuyoweina Gheghetehaharana a anima'ae waigarina auhinenina. Nahidana eyagi ara'aratana auririvana i tughura, ma tauvipa'ipa'i maitehi i rarana. 55Numa auhinenina gudutaupuyoweina ghaeghaehi ma Tauvi'ogatara* atapuhi Yesu a dewabo'a hi baibaihei po wavu hita verei ma hita vihiragheni, ma egha aiwa hita nehaghai. 56Tauviwavu maghamaghauhi hi ne'i po Yesu hi vibabanimoruwei hi verei, ma ahi babani egha ita vi'aroni. ▼57Anima rava ghehauhi hi vomahiri po ahi moruwei Yesu hi viwavui. Ma hipa, 58“A nonori i ririwa ipa, ‘Apo we Maimaituwa a Numana rava nimahiyei hi vowavowaiya a goruhi, ma maratom tonugha aumurina ma apo vouna a vowai, egha me rava nimahiyei hi vowavowaiya nana'arena.’” ▼ 59Wate egha ahi dede hita dewai po ita vi'arona dadani.
60Anima Gudutaupuyoweina Gheghetehaharana atapuhi aunaohi i vomahiri po Yesu i vitaravirevirei ipa, “We dewabo'ana aubaina hei wavum ma egha am aniparibeeyana ghehauna aiwa'i?”
61Wate Yesu i vogenuwana ma egha babani emosi ita yatoni. Ma Gudutaupuyoweina Gheghetehaharana i raubayadanameei ipa, “Moina tam Maimaituwa a Vinevine Waiyawahanana,* Maimaituwa Wai'ahi'ahinana Natuna?”
62Yesu i paribeei ipa, “E ta'u, ma apo ona inanai ta'u Rava Natuna a tughura, Manimaninina au aho'ohohina, ma apo a nene'i marei a hapau'u!” ▼
63Nahidana Gudutaupuyoweina Gheghetehaharana ana kwama i roroi ma ipa, “Egha viwavu maghamaghauna tata ghoheghohei! 64Aita o nonori, i riwa da tauna yana Maimaituwa maitena emo'emosihi. Ma ami vikaha menana'arena?” Atapuhi hi amvine po tauna yana wavu i vaini aubaina po anina da hina vihiragheni.
65Anima ghehauhi hi vikare po hi hovahovai, ma matana hi raghitapupui, ma nimahiyei hi raviravi ma hi ririwei hipa, “Mepada tam peroveta yana ma riwe'ai aiya i ravim.” Anima tauvipa'ipa'i hi naiyei po hi raunavanavai.
Peter, Yesu i Boviyei
(Matthew 26:69-75; Luke 22:56-62; John 18:15-18, 25-27)
66Na marana emosina auwarina Peter yohora anima'ae waigarina auhinenina, ma Gudutaupuyoweina* Gheghetehaharana a taupaura wavinena ghehauna i ne'i. 67Ma maranai Peter i inanai i rarana, yana i inana tunutunui ma ipa, “We tam maitem yana Yesu Nazarethei a tauvotagho.”68Ma i boviyei ipa, “Egha ata hanapuwei wate au nuwanuwa'u egha ita raughadaghadari, da tam aiwa ei babaniyei,” ma i hopu po i nae gari au mata'etana anima kamkam i tou. ▼
69Anima taupaurana wavinena i inanai yana taumahiri i riwanamehi ipa, “We ravana yana a tauvotagho ghehauna.”
70Anima Peter i bovime, ma mara haburuna ma nahidana, taumahiri hi viwavumeei hipa, “Moina dumana, tam yana a tauvotagho ghehauna, wate tam yana Galileeyei.”
71Ma i vomahiri po ipa, “A'u gwara amata moina a ririwa duma! Na ravana o deedeiya ta'u egha ata hanapuwei! Inapa a morumoru yana anina da Maimaituwa ina kovoghi'u.”
72Ma nahidana yana kamkam mara viruwaina i tou, ma Yesu, Peter auwarina aiwa i ririweiya nuwanei i ghae ipa, “Muriyai po kamkam mara ruwagha ina tou, yana apo tam mara tonugha ma boviye'u da egha uta hanapuwe'u.” Anima i notai po nuwanuwana i tou hapuwei.
Copyright information for
TPA